Schäi, dassner in unsern Schobb guggen.
Do gebbds uff jeden Fall unser CDs unn manschmol ach Schörts unn annre Sache.
Mir versuchen den immer aktuell zu halde…manschmol verpeilts hald unsern muddergebuide Webdebb den Dinger zu aggdualisiere…sinn bidde nidd bees desweeche…mier schwaadenen dann!
Unn wie bschdelle ner?
Alla: Ihr schiggen ganz altmodisch e Mäil an uns (schobb@geldetnelt.com), wu drinschdeht, wassner wollen. Dann schreiwe mer eich die Bankverbindung unn alles zurigg. Getscheggd? Ach, schreiwen äfach!
Viel Schbass beim Schobbe…also kaafe, nidd m Schobbe Riesling Schorle…obwohl doch, dodebei nadierlich ach viel Schbass…ach Gott, hedd ich jetzt gern n Schorle…ich glaab, ich mach mer jetzt änner….obwohl, s is noch e bissl frieh defier….vielleicht wann ich mei Sache, wu ich hei mache will uff morche legg?…dann mißt ich die Sache, wu ich morche mache wollt iwwermorche mache…unn so weider…oar, wann des dann immer so weidergeht, dann kinnd ich erschd mit ämme Daach Verschbeedung in Rente geh….des weer mers awwer wert!!!
Alla dann, viel Schbass beim Schobbe!!!!
Schallplatt
Es is wirklich wohr worre: Unser erschdes Winühl!
Mit Klappkawwer unn Textblatt unn nadierlich mit me Haufe gigandischer Melodiee, die ihresgleichen in Grund unn Bodde tschaggen.
Beschdelle kammer des die Langschbielplatt dorde:
Studio Heinz Records
Kabbe!
Egal ob mer sei komischie Frisur verschdeggle will odder äfach nur leicht e kaldes Gehirn kriecht, so e Käbbl is doch ach äfach was Tolles.
In schwarz unn annre Farwe…am beschde mol noochfrooche wand kä schwarz willschd.
Kapp fer de Kopp:
10 wichdiche Euro
Ausstecherlich!
Zum Kekse bagge gebts jetzt e schehnes goldenes Ausstecherle… kinner uns pragdisch esse, wanner wollen.
Austechförmsche in echtem Plastikgold odder in rosa:
4 gebenedeite Euro
T-Schörts
satanis immer noch erhebit wied Sau.
es gibt noch verschiedene Farwe…am beschde schreiwe, dann machemer e Foddo dodefu, was noch do is unn dann saachener wassner wolln.
Zum Endlich-simmo-nit-die-zwä-Tübbe-druff-Preis:
15 Euro of death in hell with fire and blood
Dasche
Geildasch of Dessmätl, Ei wanne buije wiss ju…
in rout, schwarz unn petrol do
Stoffdasch mit lange Henkel unn mit weissem Uffdruck.
Zum Gugg-nit-so-bleed-Preis:
8 gern hergewwene Euro
SATANIS ERHEBIT
S erschde Black-Metal-Ausmoolhefdl fert Kinnerschuul?
S Hausaufgaawehefdl fumme Seriemörder?
S Necronomicon als pälzischer Comic?
De erschde Kawwer-Entwurf fer „Saatschnt Päppas Lounlie Harz Klapp Bänd“ funn de Biedls?
Nain, nain, nain unn nochmol nain!
Die Bangert henns nur widder nit losse kinne, an ihre Inschdrumende rumzufuhle unn Bleedsinnn zu babble bisse widder n ganze Hawwe voll Musick zamme katt henn.
Funn 2021. Hefdl mit 24 Seide. CD mit 26 fett krankgegeilde Liederlich.
Bimbes pro artefaktum satanii:
8 schwarzmagische Euro
NEUER ORDNER
Jetzt sinnse dodaal iwwergschnappt, die Nixbligger: E Reclam-Hefdl, odder was? Kä Geld mäh fer Farwe uffm Kawwer, odder wie? De Unnerschied zwische geil unn gääl nidd gerafft? Zu faul fer n gscheide Name zu finne?
Odder äfach NUR genial unn abgeklärt? Des kinnener nur IHR SELBSCHT entscheide, wanner eich des quietschgääle Hefdl mit CD zuleggen!
Funn 2019. Hefdl mit 20 Seide. CD mit 23 Liederlich.
Unn der gääle Haufe koschd:
7 leichtverdiente Euro
DU AUGE
Wasn däss? Ä ovalie Schallplatt? Ah nähhh, ä mit Liebe bebilderdes unn vollgschriwwenes Hefdl mitre CD voll mit frenetisch abgenollerde Lieder!
Lossen den ganze Bäbbl hinner Eich unn gehn in e Welt, wu mer nix tschegge muss.
Funn 2017. Hefdl mit 28 Seide. CD mit 21 Liederlich.
Unn der blankpollierde Wahnsinn koschd:
7 gut ageleggde Euro
BIETZE präsentiert was, unn zwar:
ca. 10.000 Jahre Geld et Nelt
E Hefdl zum drin lääse mitre CD zum dezu heere. E Äächewääd unn en Ohreschmaus gleichzeidich sozusaache. Wer jetzt noch n Schorle zur Hand hodd, der kann sich alle Sinne kabuttballre.
Funn 2014 mit 28seidichem Heftelchen unn 22 Liederlichleinchen.
Der Dinger koschd mo widder nur:
5 durchgenollerde Euro
Das Königsfeld der Hirnmusik
Wasn Rausch, in den mir uns do neigschbielt henn mit unsre viele illuschdre Gaschtmugger. Die CD kummt mit 20-seidichem Buklett total aagewwerisch doher mit alle Tecksde
(inkl. hochdeutscher Übersetzung!).
Funn 2012 unn schunn widder sinn 21 Lieder druff.
Quanda koschda? Isch saach dass:
5 klänne Euro
Liebe
CD in zwedder Ufflaach: Mit 28-seidichem Buklett mit alle Tecksde (inkl. hochdeutscher Übersetzung!) unn Babbedeggl ausserum.
Funn 2010 mit 21 Lieder druff.
Koschdepunkd:
5 lächerliche Euro